حكاوي سميه مفيش راجل يساعد مراته كتابة سميه خالد
"مفيش راجل يساعد مراته ف شغل البيت الراجل يقعد ويأمر
والدتي دايما تقولي مينفعش تساعد ف شغل البيت او حتي تدخل مطبخ ودي حاجه عمري ماعملت بيها أنا شايف بما إني اتجوزت وكمان البنت اللي قعدت خمس سنين بحبها ف صمت ، يعني دخلت حياة فيها مشاركة حتي ف شغل البيت
حكاوي سميه خالد
أول لما عرفت إن منال حامل كنت بجري زي الطفل ف شقة زي اللي فرحان برجوع روحه من تاني الدكتورة وقتها طلبت مني ان مينفعش تشيل حجات تقيلة او تعمل مجهود كتير ومينفعش أبدأ أبدأ تزعل
"هو في حد يقدر يزعل روحه يعني؟"
دخلت أصلي ركعتين شُكر وقلبي كان بيتنطط من الفرحة لحد ماقعدت واتفقت معاها اني ففترة الحمل انا دراعها اليمين ف شغل البيت والطبيخ والغسيل
-مايصحش ي محمود انتَ برضو بتيجي من الشغل محتاج ترتاح وتاكلك لقمة هو حد قالك ان الست الحامل بتفضل قاعدة علي السرير دايما ي استاذ؟
_لا الست الحامل بتقعد بترتاح وجوزها حبيبها يجبلها كل اللي هي عوزاه
دخلت لبست المريلة بتاعت المطبخ وروحتلها الأوضه
انا جاهز تحبي تاكلي اي النهاردة ي فندم
ضحكت بكسوف وانا شايف ف عنيها نظرة فخر وحب ليا
الاه دي الستات طلعت بتتبسط ب أي حاجة بنعملها؟ حتي لو حاجه بسيطة
_أي حاجه من إيدك حلوة
-مش نفسك في حاجة كدة اي حاجهه
_ملوخية وفراخ اممممم نفسي أكلهم بقالي فترة
-أحلي ملوخية هتاكليها النهاردة
افتكرت ان ماما اتصلت الصبح وقالتلي هتيجي تتغدي معانا
دخلت حطيت الملوخية وحمرت الفراخ ف وقت واحد وبعد ماخلصو عملت السلطة ، ماما جت بصتلي من فوق لتحت وخدتني بعيد عن منال وقالتلي الجملة المعتادة اي اللي انت عامله ف نفسك ده ي ولا دي كدة هتدلع عليك "مفيش راجل يساعد مراته ف شغل البيت الراجل يقعد ويأمر" تبقي تجيب مامتها او أختها تعملها كل ده انت ياعيني بتيجي هلكان من الشغل
_صدقيني ي ماما انا بكون مبسوط لمابعملها أكل ويعجبها
فضلت 8شهور علي حال ده وهي الصراحه كانت بتخليني انزل الشغل وتقوم تعمل سعات اكل من ورايا لحد ما في يوم كنت رايح الشغل ومش هنكر كنت حاسس اني مضغوط من كل نحية لقيت ورقه ملونة علي التلاجة مكتوب فيها " حبيبي شكراً علي مجهودك معايا شكراً انك مستحمل مزاجي المتقلب شكراً لإنك مقدر اني تعبانة وبتحاول تخفف عني ف عز ما انت كمان بتكون تعبان وبتحاول ماتبينش ، انا عملت الغدا رقاق باللحمة ورز بسمتي وسلطة عشان بتيجي تعبان وببقي عاوزة اقوم اساعدك وانت مبترضاش ، هتلاقي الفطار علي ترابيزة في المطبخ إفطر قبل ما تنزل عشان تقدر تكمل اليوم "بحبك"
حكاوي سميه خالد
أول ما قرأت الورقة "حسيت ان كل الضغط اللي كنت حاسس بيه من دقايق راح ف ثانيه بمجرد ما شوفت الورقة
كل يوم بتأكد ان الجواز بدون مشاركة بيبقي باهت ، هي بتستحمل عصبيتي وخنقتي بتحاول دايما تراضيني شيلاني فوق راسها من ساعة ماتجوزتها ، عمري ماحسيت اني بقيت ف سجن ومقيد ومش عارف أقابل صحابي حُباً مني نتشارك ف شغل البيت حُباً مني أشيلها لما تتعب واخفف عنها ف وقت حُزنها اكتشفت إن في نوع من الستات لطيف بيتراضي بكِلمة حلوة ، وردة ، أكلة حلوة من إيدك
الستات مش نكدية انتَ ال بتختار تخليها تعاملك ازاي وهي اللي متحكمة ف ازاي تفضل تحبها
يعني هي لو مدلعتش علي جوزها حبيبها هتدلع مين ؟
هي مسكَني ورُكني الذي الجأ إليه حين تضيق بي الدنيا
هي كل شئ لطيف أحبه♥️
إرسال تعليق