نوفيلا للروايات بقلم خلود ناجي
- نص حظك يابنتي بس
ابتسمت بهدوء " ليه يعني ؟" - انتي بتتكلمي جد؟ انتي بقيتي خطيبته رسمي ، يابنتي دا انا واصحابي كنا بنتمني نشوفه من بعيد حتي ... دا اجمد كاتب في الكون، هو انتي بتقريله؟ "لا ، مش بحب القراية" -نعم ؟ يعني متعرفيش براء خالص ولا قرتيله ؟ "
صغيرتي حكاوي بقلم خلود ناجي
اه ، ويلا ندخل المحاضرة بقي " طبعا اصحابي عاملين حفلة وعازمين نفسهم في اغلي مطعم عشان أنا اتخطبت ، طيب وانا اعزمكم لييييه ،وطول المحاضرة بيبعتوا رسايل في جروبنا الخاص وبينزلوا صور خطيبي ويعاكسوه ... اصحابي اوي ، براء كاتب مشهور معروف بين البنات اكتر ، شكله حلو جدا وشيك ، كتاباته حلوة للبنات وتخليك تحب نفسك ، أو تحسسك انك بتحب حد بس مش عارف مين ، كل بنت بتحبه وبيكتبوا فيه شعر كمان وعاملين جروب ليه يمدحوا فيه ، كل دا عرفته من اصحابي لاني أساسا مكنتش اعرف مين براء دا ، غير أنه شخص اتقابلت معاه في ايفنت وكنت أنا المنظمة وبعدها اتفاجات أنه في بيتي بيخطبني ،
كانت صدمة ليا حقيقي ولاصحابي اكتر وللبنات الفانز عنده بقي كانت مصيبة ، وقتها نزل بوست اني خطيبته مش هقدر اوصفلكم كم الشتايم اللي خدته واللي قالي عاملة سحر واللي طلبوا صورتي عشان يطلعوا فيا عيوب ، واللي عايز يعرف مكاني عشان نتصاحب ، .... بجد ايه دا كله " سارة هرميكي تحت العربية والله سيبني في حالي انا مصدعة لوحدي" - مش هسيبك غير لما تديني رقمه " رقم مين ؟ انتي عبيطة ياحبيبتي ، جماعة الموضوع بدا يضايقني من كل النواحي ، مش عايز اسم براء حتي " مكنتش خلصت كلامي ولقيته بيرن ... منكرش أنه شخص لطيف جدا ، متفهم طبيعتي كبنت، بيقدر مشاعري ولسانه حلو جدا ، دايما هدايا وخروجات كتير... بيكتب وياخد قلبي معاه دلوقتي ، علطول بيبعتلي صوره ونختار اللبس مع بعض ، بيحكي تفاصيل يومه كله ، ببساطة اتعلقت بيه ....
بس هو دا كافي عشان أحبه ؟؟؟ " اي دا ... قلبظ هنا ...جيت امتي ؟" - عارفة لو قلتي الاسم دا تاني هموتك ، خالتي شوفي بنتك احسن اموتها ضحكت علي شكله وهو متعصب ، جاري الكبير ، اخويا وكان صاحبي ، سافر من سنين بييجي زيارات هنا ، كان اسمه قلبظ زمان عشان كان بخدود وتخين بس دلوقتي خس جدا ، وبقي شخص تاني ، بيزورنا مرة كل سنتين تلاتة ، كنا شلة زمان مكونة من ٦ أشخاص ، ٣ بنات و٣ اولاد ، ٢ اتجوزوا بعض واتنين سافروا وكل واحد اتجوز ، وانا اتخطبت وهو لسه زي ماهو سنجل بائس " المهم ، ماما عايزة اكل ، مدثر مش هتتجوز اجوزك سارة صاحبتي" - يابت هضربك ، انتي لسانك طويل كده ليه ضحكت بصوت" دا انا غلبانة" - طبعا طبعا المشكلة اني عارف ، مين بقي تعيس الحظ اللي أمه دعت عليه وخدك " لا ياحبيبي دا أمه دعتله وخد واحدة سكرة وامورة وملاك كمان " -طيب اوعي عشان جناحاتك هتدخل في عنيا " نينينيييييي، المهم هو اسمه براء كاتب جامد كده مش اي حد يابني، ماانا قولتلك مش هتجوز اي حد يابني " - مبروك وربنا يتمملك علي خير "عقبالك ياقلبظ "
- ماشي يا دبة "ياماما ... خليه يبطل يقولي يا دبة دي " كوثر: والله لو حد قالي انكم عقلكم صغير كده مكنتش هصدق... اعقلوا شوية - والله ياخالتي هي اللي مستفزة كوثر: انا هدخل اغسل المواعين ويارب اسمع حد بينادي عليا هطلعلكم بسكينة اموتكم " اشطا اتفقنا ، مدثر " - مالك ؟ " حاسة الموضوع سريع اوي ، اتخطبت والفرح في نهاية السنة وكمان يعني .... - كملي " مش عارفة يامدثر ، حاسة الدنيا متلخبطة وسريعة اوي اوي معايا ،براء كويس معايا بس في حواليه ناس كتير انا مش غيرانة ولا ممانعة بس حاسة اني زيي زيهم , فاهمني" - سندس ، هسالك سؤال مرتاحة معاه؟ شايفاه مناسب من كله ؟ عرفتي عيوبه وقدرتي تتأقلمي عليه ولا مش عارفة ؟ انتي نفسك شايفة اني عايزة تكملي كل حياتك معاه ؟...براء حياته غيرنا يا سندس ، هو كاتب وليه متابعين ومعجبين كتير وهو دا شغله ...يعني ممكن واحدة تموتك ونرتاح منك عادي " طيب يالا اتكل كده علي بيتكم " براء ومدثر ، كل واحد فيهم مكانته شكل ، وكل واحد بتعامل معاه بشخصية غير ، ماما من زمان وهي بتعامل مدثر ابنها لدرجة اني فعلا الكل فاكر اننا اخوات ،
هو الوحيد اللي بتخانق معاه واهزر ... أما براء فهو خطيبي وحبيبي يعني بتعامل معاه برقة ولطف وبكون عاقلة ومينفعش اتصرف معاه زي مابعمل مع مدثر ... النهاردة مدثر رجع بس واضح أنه هيستقر هنا جدد ديكور شقة أهله الله يرحمهم وفتح صيدليه جديدة ،هو شخص تقليدي جدا جدا وكلاسيكي ، وممل اوقات كتيرة جدا بس ... مميز ، براء بقي النقيض واحد محبوب من الكل ، اصحابي بيحسدوني عليه ، كتاباته حلوة جدا بس مش قادرة اشوفها ولا احس بصدقها، بشوف الكتاب دول ناس كادبة بيعرفوا يزوروا مشاعرهم وبيكتبوا مشاعر ممكن عمرهم ماحسوا بيهم ، يعني بيكتبوا عن الحب وممكن هو عمره ماحب، الصداقة وهو معندوش صاحب واحد حتي ، .... بس مش بيعرفوا يكتبوا مشاعرهم الحقيقة ، قهرة قلوبهم مش بيقدروا يجسدوها في كام حرف، المشكلة اني لو كاتبة وبكتب هتعب، ازاي أساسا اكشف مشاعري واقول أنها مجرد خاطرة والكل يعجب بيها ويعلق عليها وهي في الأساس مشاعري ..
.بحس الموضوع حزين جدا ... بس اكتشفت بعدين أن الكاتب بيشارك كل حاجة الا حزنه ... حزنه مدفون مش بيتشارك غير مع اللي بيحبهم " براء ، انا حقيقي مقدرة شغلك وكل حاجة بس الوضع بقي اوفر، اه انت كاتب ورومانسي بس مش لدرجة تحب في البنات في الكومنتات وواحدة محتفظة بصورك والتانية عاملة فرح عشان روحت عيد ميلادها ، اومال لما هما بيعملوا كده انا اعمل ايه ؟ ....
- انتي من قبل ماتتخطبي وانتي عارفة طبيعة حياتي ، وكمان انا راسم حدود ومستحيل حد يتخطاها " راسم حدود؟ لتكون راسمها بقلم رصاص اصلي اللهم بارك البنت بتقولك ياروحي وقلب احمر ، دا انا اهو وعمري ماقولتها " - يابنتي عادي أساسا انتي الأصل فكك منهم " لا برضوا تحاول تحط حدود اكتر " -حاضر ممكن كفاية نكد بقي ابتسمت"كده شطور" قلب احمر؟ دي البنات بتنزل صوره وبيكتبوا فيها شعر ، ياللي منكم لله غلط كده، رغم أن الموضوع يبان مضحك بس بيتعبني جامد حقيقي ، ليه بنات تحتفظ بصوره ...وليه بنت
تقولها أنها بتحبه اوي حتي لو سنها ١٥ سنة ... مدثر معاه حق براء غيرنا ... - تعالي معايا ... "فين ؟" - اشاركك نجاحي ابتسمت ونسيت كل حاجة تزعلني ...اعترف أنه بيعرف جدا ينسيني زعلي وبيعرف يفرحني ... حضرت معاه حفلة توقيع روايته كان الكل بنات وضحك وهزار ، حاولت افرح واشاركه واتقبل طبيعة حياته ... وعشانه هحاول ... -اتبسطتي؟ "جدا ... كفاية انك مبسوط " بيجيب هدايا كل مانتخانق في الاول كنت بفرح بس بعديها مكنتش بهتم .... بس برضوا عرف ينسيني زعلي ، وأنه نزل صور أيدينا وكتب شعر وخواطر رومانسية ...في الاول كنت مبسوطة بس بعدها اتضايقت من البنات ورود أفعالهم ... انا عايزة واحد يحبني بس مش قدام الناس مقصدش حب في السر ، لا بس ميحبنيش وكل حرف يكتبه علي السوشيال ميديا عشان يتاخد شير والناس كله تشوف قد ايه بنحب بعض، لا انا مش بحب كده ، انا عايزة لما بيحبني ييجي يقولي ، مينزلش حاجة علي الفيس او انستا او اي حاجة ...
عايزة حبه يكون واضح من نبرة صوته وخوفه ،من كلامه معاه ، من اهتمامه .... مش من كلامه علي الفيس ...حب الفيس ومشاعرهم بنسبة كبيرة فيك ... كمان انا لو بحبه يهمني في ايه اني اخلي الناس تشوف حبنا ... يكفيني حبيبي نفسه يكون متاكد من مكانته في قلبي ... ودا سبب خلافي مع براء "مدثر ...ماما تعبانة اوي " كنت مرعوبة لما شوفتها واقعة في الأرض ...حسيت قلبي وقع في الأرض... قعدت جنبها وانا بعيط ، متعودتش اشوف ماما ساكتة كده ، عقلي وقف وبدأت عياط ،كنت عايزة ماما تقولي اعمل ايه ...فوقت علي رنة تليفون ماما ... رديت علطول " ماما .... ماما " - في ايه ؟ ردي بتعيطي ليه ؟ "مدثر ماما اغمي عليها تعال بسرعة بالله" كان موجود واهتم بيها ...الضغط بس وطي ودا السبب ... فضل قاعد جنبها وبيهتم بيها وانا واقفة اعيط وبس - محصلش حاجة "انا خوفت اوي يامدثر ، حسيت اني لوحدي ...اول مرة احس كده .. اتخضيت اوي اوي والله ... وخايفة اوي ومازلت خايفة " -اهدي وبطلي عياط، خالتي بخير وانا هنا ، متزعليش ، عمرك ماهتكوني لوحدك ، لاني هفضل هنا ، يلا ادخلي نامي واساسا خالتي كويسة والله ... وانا همشي وهاجي الصبح "لا خليك هنا " -مش هينفع ...هفضل صاحي ولو عوزتي حاجة كلميني " طيب اعمل ايه ؟" - هروح ابعتلك رواية حلوة اقريها ولا ابعتلك ... "لا مش عايزة.." اتنهد' طيب اعمل ايه عشانك ؟ عيطت "متمشيش "
- مش هينفع والله ... طيب هقعد برا عالسلم ... " لا ...طيب ارجع البيت" - بصي انا هرن عليكي كل ساعة حلو كده ؟ "اه تمام " مدثر كل فترة كان بيتصل ويطمن ودا طمني فعلا ...وقتها براء بعتله رسالة ومردش ، رغم أنه كان فاتح ...بعدها كلمني ومهتمش حتي أنه يشوف في ايه ، ممكن وقتها لاول مرة اكتشف أنه اناني أن الشات بتاعنا كله عنه ، حقق ايه وعمل ايه ، ونفسه في ايه ،وهو ازاي بيعمل شعره وازاي البنات نفسهم يكلموه ، انا اكتشفت اني لو اتكلمت عن نفسي بيسيب الموضوع ويقفل كلام أو يرجع يقاطعني ويتكلم عن نفسه ...كمان طلع بيحبني لمجرد أنه عايز يحب يعني مش عشان ذاتي ، واحد مشاعره العمر دا كله مكتومة وعايز يطلعهم ... اكتشفت معاه في فروق كتير بين شخص عايز يفرغ مشاعره وشخص بيحب بجد ....شخص حبه حقيقي وصادق وشخص بيحب عشان الناس تحكي عن حبه ... كل فترة كنت بركز اكتر وبلاقي اني فعلا كنت غلط، انا كنت بدور علي حب اعمي كنت أنانية جدا وبدور لواحد ليا بس واحد يحبني فترة ونتجوز ومع ضغوط الحياة معرفش هنفضل كده ولا لا ، شخص دينيا مرفوض ، بيتعامل مع البنات من غير حدود ، ... معرفش حتي حاجة عن علاقته مع اهل بيته ... معرفش انا ليه كنت عشوائية ومركزتش في صفاته وأخلاقه عشان اعرف هنكمل ولا لا .... - دقيقة ياسندس ... اصحابي اديلي فترة مشوفهتمش حاولت ابتسم "اه اتفضل" كنا قاعدين في كافيه كنت عايزة اتكلم معاه بس قعد يتكلم عن العقد الرواية الجديد وشغله ... كنت لسه هتكلم بس أصحابه وصلوا وقف معاهم ... كنت فاكرة أنهم هيقفوا عشر دقايق بس ... بس مر ساعة وانا مليت " براء انا همشي ..." - بس ...اصلي اصحابي ابتسمت بضيق" لا مفيش مشكلة خليك معاهم وانا همشي عشان اتاخرت .." -اوقفلك تاكسي اتصدمت من ردة فعله أنه حتي معرضش أنه يوصلني من الصدمة سكتت ... وقفت انا تاكسي ومشيت ...كنت كاتمة دموعي مش عارفة الموضوع بسيط ولا انا اوفر بس هو أصحابه بيقابلهم كل اسبوع يعني وحتي لو ...احنا اتعلمنا في عاداتننا اني لو راجل معاه واحدة من أهل بيته ميسبهاش ويقف مع أصحابه ... روحت البيت ونزلت في شارعنا. ..كنت هرجع البيت بس دخلت الصيدلية عند مدثر وهو اتخض من عياطي ياحبة قلبي ... - مالك يابنتي وقعتي قلبي ؟ عيطت" مفيش عايزة اعيط بس " - والله اخنقك وارتاح. .. مالك ؟ هدير: ممكن اشوفها انا يادكتور مدثر -اه اتفضلي هي مالها الباردة دي بيا ،... والله العظيم لو مابعدت لاضربها... كمان هي بتضحكله ليه ... "لا مفيش ... مش عايزة حد " مشيت وحقيقي مش عارفة مالي ، انا مش بطيقها البنت دي ، كمان من شهور وهي بتشتغل مع مدثر وبتتدلع عليه وانا بقرف من الشغل دا ... - انتي صاحية ليه لحد دلوقتي ؟ احنا في نفس العمارة بس هو في الدور التاني واحنا السابع .... في ايه لما افضل منتظراه علي السلم الساعة ١ " اتاخرت ليه يابيه دا كله ؟" استغرب' كان عندي شغل وجرد والله ' " وهي كانت معاك ؟" -مين ؟ "متستعبطش ... المساعدة الباردة دي " - مالك ؟ وبتتكلمي كده ليه ؟ " متردش علي سؤالي بسؤال ، البنت دي تمشي ، كمان دي باردة وملزقة و .. اتعصب' سندس ... فوقي كده وغلط بتتكلمي علي حد " والله لو ماردفتها لازعلك ...البت دي هتمشي" -اطلعي نامي ياسندس ...روحي كلمي خطيبك " لا ...هات الموبيل كده..." -سندس "اااااه " معرفش غير اني كنت متعصبة جدا وكنت مخنوقة من البنت دي وعشان كده اصريت اخد الموبيل بتاعه اكلمها وارفدها ... حاسة اني باردة سيكا ... هو رفض اني اخد الموبيل والنتيجة رجلي اتجزعت ووقعت علي السلم وأيدي اليمين اتشرخت وجبيني انجرح جامد .... " كنت هتكسرلي ايدي ياللي تنكسر رقبتك
ضحك' بتدعي عليا في وشي ' "لف وادعي في ضهرك عادي. .." - امبارح كنتي هتموتي والله ،فكرتك موتي ورقبتك انكسرت وارتحت منك " والله اقوم اموتك " -مالك بقي ... " مفيش " -لا انا مش خطيبك ..يعني اقول مالك تقولي علطول " معرفش حقيقي ... بس انا حاسة اني مخنوقة ومش حابة اكمل ،فاهمني ؟" - طيب انتي متأكدة من القرار دا " معرفش .. مش عارفة حقيقة مشاعري " - طيب ابعدي عنه يومين كده شوفلي هتقدري تتعاملي عادي ولا ؟ " انا هعمل كده فعلا ... المهم ارفد البنت دي ؟" ضحك' ليه بس ...دي جايز تكون مرات اخوكي' "لو راجل اعملها ؟" رفع حاجبه'نعم ياختي ؟' "قصدي لو جدع " - طيب اسكتي عشان مكسرش باقي عضمك واحنا في المستشفي اهو بالمرة "ماما قولتلها صح ؟" -اه وطمنتها "تعرف امي بتحبك اكتر مني. ..بكرهك اوي ياجدع" -وانا بحبك دا بيهزر ياللي مني لله ... انا بعمل ايه بجد ، انا مخطوبة لواحد وبفكر في التاني ...والتاني هيخطب ... ايه الدوامة دي ... - مختفية من اسبوع ليه ؟ انا قولت تبعدي عن خطيبك مش انا ؟ " انا بعتلك عشان تكلمه عشان مش عايزة اكمل " -متاكدة؟ " مدثر هو مش بيعرف يحب غير نفسه وبس ... وانا مش محتاجة شخص زي دا ...انا كمان مش محتاجة شخص يحبني ،
انا بس محتاجة واحد يخلي باله مني ..يعني انا مهملة جدا اعرف اهتم بالكل الا نفسي ، كتومة جدا جدا ومش بعبر عن نفسي فعايزة حد يعرف يتأقلم علي كده ومعاه هتكلم ، كمان يعرف اني تلقاىية وبكره اني حد يحكم عليا ، أنه يقلل مني ...انا مش عايزة حب قد ماعايزة شخص يكون عارف يعني ايه يتقي ربنا فيا ...يكون راجل بجد ، يعرف امتي يسكت وامتي يتكلم، ميهزرش مع اي واحدة .... يكون تقيل في تعامله مش عيل ... شخص يكون امين علي حياتي كلها .. ميهتمش بكتر البنات حواليه ...واحد فعلا يخدني عشان نعيش حياتنا في الدنيا صح وبنرضي ربنا ونكملها في الاخر ... صح .. بس دا اللي عايزاه" مر شهر وانا بعيدة عن الكل ، مشاعري استنذفتها مع براء للاسف ...كنت متضايقة وزعلانة من نفسي اوي ... الخطوبة اتفشكلت وهو تقبل الموضوع وفعلا طلع شخص اناني ... بس انا هنا بحاول اصلح من نفسي ...اكون واحدة تانية ...بعدت عن مدثر رغم اني اتاكدت اني بحبه بس غلط وجودنا مع بعض ...
كلنا عارفين الغلط والصح بس بنكابر وانا مش ضامنة عمري وجه وقت اني ابعد .... وعلي قد حبي ليه علي قد ماانا فرحانة اني بعدت عشان ارتاح ... طلع في حاجات اهم بكتير من الحب والصداقة الكلام الفاضي دا ... طلع في حب لربنا ...حب يخليني أنام مرتاحة ... شوق غريب للقاءه ...طلع في حنين لأيام الصحابة والرسول، في احترام وخوف من عظمة وهيبة زوجات الرسول ... وصداقة الرسول ... طلع في حاجات كتير احنا الدنيا لهتنا عنها .... " قلبظ متقدملي...احم اقصد مدثر" - واضح التغيير فعلا ... انا عارفك بس هنتخطب ٦ شهور لاني معرفكيش غير صديقة ودلوقتي عايزة اعرف هتكوني زوجة وأم كويسة ولا لا ... وعشان كده انا هنا ... ودا لو وافقتي وحصل نصيب " ٦ شهور مروا بسرعة جدا جدا حلوين مفيش غير كلام قليل ، كل مابقرب بحبه اكتر ،
اه هو عصبي جدا جدا وبيتضايق بسرعة اوي اوي وغيور حبتين بس برضوا حبيبي ، ... والأهم أنه بيفكرني دايما اني هدفنا رضا ربنا وبس " - بقيتي مراتي رسمي يا دبة "والله ياقلبظ لاضربك" -في واحدة محترمة تقول لجوزها ياقلبظ "وفي واحد جدع يقول لمراته يادبه" -لسانك اطول منك ...اقولك بقي اني كنت هتقدملك قبل ماتتخطبي بس لما تخطبتي عرفت انك مش خير ليا ...مزعلتش اوي الصراحة بس حاولت اخطب غيرك بس مكنتش برتاح وسبحان الله .. تمر الشهور وتفسخي الخطوبة وارجع افكر فيكي تاني ...صليت استخارة واتقدمتلك وانا مستغرب موقفي وكنت فاكر انك هترفضي بس اتفاجات بموافقتك " اقولك حاجة بسيطة خلتني احبك هو بسبب موقف واحد بس ... لما ماما تعبت وتابعت معايا علي التليفون ...موقف واحد بسيط خلاك تاخد مكانة كبيرة في قلبي احفظلك حب كبير ... يابني انت حييبي مالك ياقلب أمك اتخضيت كده ليه ...لا ماانت بقيت حلالي خلاص ، واضح الرقة والهدوء ولا نوضح اكتر " ضحك'لا واضح اوي والله ' كَانَ مُمَيّزًا في قَلبِي ، حتّى أكثَر الأُمور بساطَة كانت استِثنائيّة معه ..
إرسال تعليق